Bai, baina… || SOCCER442 || futboleko jokoa

SOCCER442 futboleko jokoa

Bai, baina?

BLOGA

Bai, baina…
0 Comentarios - 1/52/53/54/55/5 - 0 / 0

 

Munduko Kopa hasi aurretik bagenuen antolaketaren inguruan izandako komerien berri. Diruak eraman zuen Mundiala Qatarrera, azpijokoak. Jakina zen baloia jira eta bira hasi bezain pronto zalaparta guztia apalduko zela.

 

   Munduko txapelketak zirrara handia eragin du berdegunean; zaleak erdigunetik urrundu zituen aspaldi ordea, eta soilik argentinarrek duten grina itzelak zertxobait hurbildu du Mundiala futbolaren bihotzera: herritarren pasioa. Txapelketaren inguruko edozein baloraziori, bai, baina… erantsi dakioke.

 

   Jose Luis Akarregi laurogei urte pasa dituen artista irundarra da. Marrazkilaria. Pandemian zehar, izurriari lotutako afixak partekatu zituen gurekin; Errusia eta Ukrainaren arteko liskarrari buruzkoak ere irudikatu ditu, eta Mundiala amaitu berritan ondorengo marrazkia bidali digu. Adierazgarria oso.

Jose Lus Acarregui

 

   Final atarian, FIFAko presidente Gianni Infantinok Munduko Kopako azpiegituren eraikuntzan lau hildako izan zirela aipatu zuen. Hedabideetan zabaldutako ikerketek, berriz, 6500etik gora ipini zuten langa. Zendutako gehienak India, Bangladesh, Pakistan eta Nepal aldekoak ziren. Eurek eraikitako estadioetan jokatu da Qatarreko Mundiala.

 

Futbola unibertsala da. Futbolaren globalizazioa deitu diote zabalkunde fenomenoari. Chelsea edo Interren elastikoak Amazoniako oihaneraino iritsi dira. Eta 2014an irudi bitxia ikusi genuen Katmandun.

 

Brasilgo Mundiala amaitu berritan, nepaldarrek Argentinako selekzioarekiko duten zaletasunaz jabetu ginen. Kalean makina bat lagun, adin guztietakoak, elastiko zuri-urdina jantzita ikusi genituen. Argentinaren aldekoak guztiak ere, Leo Messiri esker. Azken egunotan, Bangladesh aldetik, Indiatik ere bai, antzeko irudiak iritsi zaizkigu: Argentinaren garaipenak kalean ospatzen, Buenos Aires bailitzan.

 

   Hangoak ziren Qatarreko azpiegiturak eraikitzen zendutako hainbat langile. Euren herrikideek Munduko txapeldunei erakutsi dieten leialtasunak, ordea, ez du bueltako keinurik izan haien  aldetik. Gizatasun kontua. Detailea.

 

   Futbolariak urrun dira. Soilik Irango selekzioak izan du bere herritarren aldeko keinua. Ausardiaz beterikoa, Irango errepublikako agintariak euren gizartea nola zigortzen ari diren aintzat hartuta. Heriotz zigorra ezarri zioten joan zen astean Amir Nasr-Azadani futbolari profesionalari, hango emakumeen aldeko protestekin bat egiteagatik. FIFAk ez du hatzik mugitu eta futbolariak isilik geratu dira. Euren kide bat arrisku bizian izan arren.

Eta Neuza Back epaile brasildarrari ez zion eskua luzatu hirugarren eta laugarren posturako lehia amaitu ondoren sari banaketaren oholtza gainean ageri zen jekeak… emakumea delako Neuza Back.

 

   Detaileak. Ez txikiak.

 

   Mundiala amaituta, L’Equipe kirol egunkari ospetsuak lerroburu egokia ondu du Bruselan sortu den eskandaluaren harira. Qatarreko Mundialaren inguruko iruzurra Europako Parlamentura iritsi baita. ‘Munduko Kopak luzapena jokatuko du Europako Parlamentuan’, dio Frantziako egunkariak . Bruselan ere penaltiak ate joka.

 

   Garai bateko futbolariekin gogoratu gara: Socrates, Maradona… hainbat dira faltan bota ditugun zelaiko ahotsak. Bi horiek, Messi Munduko txapeldun izanaren justizia poetikoa txalotuko zuten. Bai, baina… argi hitz eginda.

 

 

 

                                                                                                                         Naxari Altuna.

                                                                                                                         Marrazkilaria: Jose Luis Acarregui.



COMENTARIOS

Añadir un comentario

:angry: :flowers: :blink: :pinch: :blushing: :crying: :ermm: :getlost: :grin: :happy: :hug: :kiss: :laugh: :blah: :smile: :sad: :tongue: :wink:





www.bitymina.com-ek garatua